Lorgaítear léirithe spéise ó úinéirí talún, pobail agus eagraíochtaí áitiúla ar fud Chríoch an Aistrithe Chóir in Éirinn a bhfuil suim acu in athchóiriú bogaigh ina gceantair. Is féidir le Tóchar cabhrú ar go leor bealaí, amhail maoiniú a sholáthar le haghaidh obair shuirbhéireachta, pleanáil athchóirithe, léirmhíniú, feasacht a mhúscailt agus oideachas agus obair athchóirithe ar an talamh.

Nuair a gheofar d’fhoirm, déanfaidh ball d’fhoireann Tóchar teagmháil leat chun cruinniú nó cuairt ar an láthair a shocrú chun iniúchadh a dhéanamh ar na féidearthachtaí atá ar fáil. I gcomhpháirtíocht leis an rannpháirtí, tabharfaidh Tóchar an cúnamh riachtanach chun tionscadail a chur chun cinn. Maoineofar 100% d’aon ghníomhartha a shainaithneofar agus a chríochnófar.

D’fhéadfadh úinéirí talún agus sealbhóirí móinchearta a bheith incháilithe freisin don íocaíocht aonuaire de €1,450 in aghaidh an heicteáir faoin scéim dreasachta, le híosíocaíocht €725 agus uasíocaíocht €15,000. Eiseofar an íocaíocht nuair a bheidh na gníomhartha molta críochnaithe go sásúil. Tá tuilleadh sonraí faoin dreasacht ar fáil sa nasc thíos.

Tá sé de cheart ag rannpháirtithe achomharc a dhéanamh i gcoinne cinneadh a dhéanann an fhoireann tionscadail de réir an phróisis achomhairc atá leagtha amach sa doiciméad thíos.

Má tá ceisteanna agat maidir le léiriú spéise a chur isteach, seol ríomhphost chuig tocharwetlands@npws.gov.ie

Próiseas Achomhairc ar Iarratais

Tá an ceart ag rannpháirtithe achomharc a dhéanamh ar chinneadh a rinne foireann an tionscadail. Déanfaidh Tóchar próiseas achomhairc a chomhordú agus a bhainistiú d’iarratasóirí nár éirigh leo. Cuirfear cinneadh i scríbhinn ar fáil ar iarraidh d’iarratasóirí nár éirigh leo, ina gcuirfear aiseolas ábhartha ar fáil agus ina leagfar amach treoirlínte agus achair ama an phróisis achomhairc. Spreagfar agus comhairleofar d’iarratasóirí nár éirigh leo aiseolas ar a n-iarratas a lorg mar chuid den phróiseas sula dtéann siad ag lorg athbhreithnithe ar an gcinneadh faoina n-iarratas.

An Próiseas Achomhairc

Is próiseas dhá chéim é nós imeachta an achomhairc. Más mian le rannpháirtí achomharc a dhéanamh ar chinneadh fhoireann an tionscadail, ní mór don iarratasóir iarraidh ar fhoireann an tionscadail achomharc a dhéanamh ar an gcinneadh laistigh de 15 lá oibre ón dáta ar cuireadh an t-iarratasóir ar an eolas faoin gcinneadh a bhfuil agóid déanta ina aghaidh.

Is é an chéad chéim den phróiseas achomhairc ná go ndéanfaidh foireann tionscadail Tóchar athscrúdú ar an gceist. Cuirfidh Tóchar gach achomharcóir ar an eolas i scríbhinn faoi thoradh a n-achomhairc laistigh de dheich lá oibre ón uair a fuair siad an t-achomharc.

Is féidir leis an rannpháirtí, mura bhfuil sé sásta le toradh an athbhreithnithe, achomharc foirmiúil a dhéanamh ina dhiaidh sin. Ní mór achomharc foirmiúil a chur ar aghaidh laistigh de 10 lá oibre ón uair a fuarthas an litir thoraidh ar achomharc chéim a haon. Ní bheidh pearsanra a raibh baint acu leis an gcéad phróiseas achomhairc bainteach leis an bpróiseas achomhairc foirmiúil. Ceapfaidh an tSeirbhís Páirceanna Náisiúnta agus Fiadhúlra Coimisinéir Achomhairc a dhéanfaidh breithniú ar achomhairc fhoirmiúla agus a thabharfaidh tuairisc ar thoradh an achomhairc seo laistigh de 15 lá oibre. Mura bhfuil an t-achomharcóir sásta leis an gcinneadh atá faighte aige ar a achomharc, is féidir leis gearán a dhéanamh leis an Ombudsman.

Más mian le hiarratasóir achomharc a dhéanamh ar chinneadh faoi Scéim Athchóirithe Bogaigh Tóchar, ba cheart achomharc chéim a haon a sheoladh i scríbhinn laistigh de 15 lá oibre ón gcinneadh bunaidh chuig:

Achomhairc – Scéim Athchóirithe Bogaigh Tóchar
An tSeirbhís Páirceanna Náisiúnta agus Fiadhúlra,
An Roinn Tithíochta, Rialtais Áitiúil agus Oidhreachta,
Ionad Teicneolaíochta Bhiorra,
St Brendan Street,
Biorra,
Co. Uíbh Fhailí R42 HX39

Cuirfear toradh an achomhairc in iúl i scríbhinn don iarratasóir laistigh de 10 lá oibre mar a leagadh amach thuas.